Si quies tocar n'ADAR
Escríbime. Equí te cuento qué programamos, qué necesito saber y por qué a vegaes tardo en contestar.
Lléguenme munchos correos de músicos y d'axencies que quieren tocar nel festival, y préstame que lleguen: bona parte de la xente que pasó por ADAR apaeció asina, escribiendo ensin que naide los llamare. Asina que sí, escríbime.
Lo que vien equí embaxo nun son unes bases nin un formulariu. Ye lo que me ayuda a decidir, contao como se lo contaría a un collaciu.
El mio corréu
Ponme esto nel asuntu
PROPUESTA ADAR · [el to nome o el del grupu] · [formación]
Pídote esi asuntu porque too entra al mesmu buzón. Si entama por PROPUESTA ADAR puedo xuntales y lleeles d'una sentada pel iviernu, que ye cuando se decide'l programa. Si non, piérdese ente lo demás. Ponlo asina anque m'escribas n'inglés o n'español, en mayúscules, y detrás el to nome y la formación: PROPUESTA ADAR · Cuartetu Bretón · cuartetu de cuerda.
Prefiero'l corréu a la llamada. Nun hai formulariu y nun va habelu.
Qué se toca equí
ADAR ye un festival pequeñu n'aldees d'Asturies. Tocamos n'hórreos, n'ilesies romániques, nun monesteriu, en palacios y al aire llibre. Cuasi nunca hai escenariu y cuasi nunca hai amplificación: toques dientro d'una piedra que lleva ehí ochocientos años y el sonidu ye'l que ye. Eso decide lo qu'encaxa muncho más que la etiqueta del xéneru.
Programamos clásica y música de cámara, música antigua —con instrumentos históricos o ensin ellos—, jazz, esperimental, electrónica, músiques tradicionales y d'otres cultures, y creación contemporánea. Tamién coses que nun son esautamente un conciertu: paseos sonoros, instalaciones, proyeutos con vídeu o con danza. Si ta pensao pa un sitiu concretu, meyor entá, porque ye como trabayamos nós.
Lo que nun programamos ye rock, pop y música comercial. Nun ye un xuiciu sobre naide: ye que nun funciona nos sitios onde tocamos. Si dudes de si lo to entra o non, mándamelo igual y mírolo.
Lo que más posibilidaes tien
Afórrote tiempu con una cosa que nun siempres se diz. El festival sosténse sobre too con subvenciones pal desarrollu de les artes nel mediu rural. Nun ye papeleo: ye lo qu'ADAR ye. Y significa qu'un conciertu a seques cuéstame muncho más defendelu qu'un proyeutu qu'amás dexe daqué equí.
Lo que más posibilidaes tien, más o menos per esti orde:
- Que vengáis unos díes enantes a trabayar nel pueblu. Tenemos casa de residencia en Lleiguarda. Un grupu que llega, se queda, ensaya, prueba coses y llueu toca nun tien nada que ver con un grupu que llega pela tarde y se va pela nueche. Nótase nel conciertu.
- Que'l programa tea pensáu pal sitiu. Nun fai falta reinventalu: a vegaes ye namái escoyer otru repertoriu sabiendo que vas tocar nuna ilesia del sieglu XII y non nun auditoriu.
- Que haya daqué cola xente d'equí. Un taller, un ensayu abiertu, un ratu colos neños de la escuela o colos mayores del pueblu. Nun tien que ser complicao; abonda con que tea pensao y nun seya un amiestu de última hora.
- Que haya un vínculu con Asturies, col patrimoniu rural o cola memoria del llugar. Nel repertoriu, nos materiales o en con quién collaboráis.
Nun fai falta que cumpláis les cuatro. Con una, bien pensada, yá vamos bien.
Si tu tamién programes, falemos d'intercambiu
Esto interésame muncho y cuasi naide lo propón. Si amás de tocar lleves una sala, un ciclu o un festival, dímelo nel primer corréu. El formatu que meyor nos funciona ye l'intercambiu: vosotros venís a tocar a ADAR y dalgún de los nuesos músicos va tocar a la vuesa casa.
Asina'l viaxe repártese ente dos programaciones en vez de cayer enteru sobre una, y los dos abrimos circuitu. Da igual que seáis d'equí al llau, de cualquier sitiu d'Europa o del otru llau del mundu: trabayamos con xente de los trés casos. Dime qué espaciu tienes, cuándo programes y qué triba de sala ye, y falamos.
Qué necesito que me mandes
Enllaces y pocu testu. Si me falta daqué tengo qu'escribite pa pidítelo, y ehí ye onde se pierden les selmanes.
Quién sois y cuántos venís
El nome, la formación, cuántes persones viaxaríeis, d'ónde sois y la vuesa web si la tenéis. Lo de cuántos venís importa más de lo que paez: equí la cama y la furgoneta cunten.
Daqué que pueda escuchar
Un enllaz: YouTube, Vimeo, Bandcamp, SoundCloud, la vuesa web. Nun me mandes ficheros axuntos, que s'atasquen nel corréu.
Y si pues escoyer, mándame vídeu d'un conciertu: una obra o un movimientu enteru, ensin cortes, con xente delantre. Dizme munchísimo más qu'una grabación d'estudiu mui trabayada. Quiero oyer cómo sonáis nuna sala.
Qué queréis tocar
Les obres, con autores y duraciones, y cuánto dura enteru. Si manexáis varios programes, mándamelos toos: ayúdame a encaxavos nuna sede o n'otra.
Cuatro llinies de quién sois
Con cuatro llinies válime. Si tenéis un dosier llargu, pásame l'enllaz, pero que'l corréu s'entienda ensin abrilu.
El caché
Esto ye lo que más s'escaez y lo que más necesito. Ensin caché nun puedo valorar nada y oblígame a escribir pa entrugalo.
Dime'l caché zarráu, si lleva IVA o non, y si inclúi viaxe, cama y comida y pa cuánta xente. Y si tenéis dalguna ayuda de movilidá del vuesu país o de dalguna institución, dímelo: camuda la conversación entera.
Qué necesitáis téunicamente
Si fai falta pianu o clave y de qué triba, amplificación, lluz, enchufes, proyeición, cuántu espaciu. Munches de les nueses sedes son hórreos ya ilesies ensin instalación de nada, asina qu'esto a vegaes decide si una propuesta ye posible o non.
Qué díes d'agostu podéis
El festival ye n'agostu. Dime qué díes tenéis llibres y si hai marxe. Y si yá andáis de xira pel norte nesas feches, dímelo tamién: a vegaes ye xusto lo que fai que salgan les cuentes.
Un teléfonu
Trabayo per corréu y prefiero'l corréu. Pero déxame'l to teléfonu igualmente: cuando una propuesta avanza, lo que queda por zarrar ziérrase en cinco minutos falando. Yá te llamo yo.
Si yes manager
Mándame'l to catálogu enteru, colos mesmos datos d'arriba pa cada artista. Pero mándamelu filtráu, y pídotelo de verdá: si me llega una llista de venti artistes ensin criteriu, güéyola y ciérrola. Si me lleguen trés qu'escoyisti pensando nesti festival, mírolos ún a ún y contéstote.
De cada ún necesito'l caché y les feches d'agostu que tien llibres de verdá, non una disponibilidá xenérica. Y si dalgún de los tos artistes trabaya en residencia, n'espacios raros o con comunidaes, dímelo na primera llinia: ye lo que más posibilidaes tien d'entrar.
Un corréu por unviu, col mesmu asuntu. Si llueu quies amestar a daquién, contéstame sobre esi mesmu filu y asina nun se desparrama.
Por qué a vegaes nun contesto
Lléolo too y escúcholo too. Pero nun contesto a too, y prefiero dicítelo equí a dexate esperando una rempuesta que nun llega. Somos mui pocos y el festival prodúzse coles mesmes manes que lleen el corréu; contestar una a una llevaríame selmanes que nun tengo.
Que nun haya rempuesta nun significa que nun me prestare. Significa qu'esi añu nun encaxó. Guardo toles propuestes y vuélvoles mirar cuando armo cada edición: dalguna que nun cabía entró dos años dempués, o entró de sutaque porque apaeció una sede nueva que-y diba bien. Por eso paga la pena escribir anque nun haya denguna convocatoria abierta.
Y lo otro que te debo dicir d'entrada: esto ye un festival pequeñu con un presupuestu pequeñu. Nun puedo pagar lo que paga un festival grande y prefiero que lo sepas enantes de que pierdas el tiempu. Por eso te pido'l caché nel primer corréu: asina los dos sabemos nel intre si hai marxe pa falar.
Otres coses que me entrugáis
¿Hai plazu?
Non. El programa de cada edición zárrase pel iviernu, asina que si llega enantes puedo mirala con tiempu. Pero escribi cuando quieras.
¿En qué llingua t'escribo?
Asturianu, español o inglés, el que te seya más cómodu. Namái te pido que l'asuntu vaya tal cual, tamién si escribes n'inglés.
¿Hai que ser d'equí?
Non. Vien xente de toes partes. Lo único: el viaxe sal del mesmu dineru que'l caché, asina que si venís de lloñe dime si tenéis dalguna ayuda de movilidá.
Yá t'escribí l'añu pasáu
Vuelvi a escribime, sobre too si tienes grabaciones nueves o un programa distintu. Con un corréu curtiu recordándome lo anterior y lo que camudó válime.
¿Esto ye la residencia?
Non, son dos coses. La residencia tien la so propia convocatoria y el so plazu. Esta páxina ye pa proponer un conciertu, anque incluya díes de residencia dientro.
¿Programáis estrenos?
Sí, ya interésenme. Dime de quién ye la obra, si ta acabada y si hai un encargu o dalguna ayuda detrás.
Eso ye too. Si llegasti hasta equí, escríbime.
Guillermo Laporta
Festival ADAR · Lleiguarda, Asturies