§ 00 · Biografía
«La so interpretación tien el poder de conmover y de dexate con ganes d'escuchar más.»
International Record Review
La violinista neerlandesa Frederieke Saeijs algamó proyeición internacional al llograr el Primer Gran Premiu, xunto con delles distinciones especiales, nel Concursu Internacional de Violín Long-Thibaud de París (2005). Dende entós actuó como solista con orquestes como la Orchestre National de France, la Russian National Orchestra, la Royal Scottish National Orchestra, la New Japan Philharmonic, la Filarmónica de Róterdam, la Residentie Orkest de La Haya y la Beethoven Orchester Bonn, baxo la batuta de directores como Jaap van Zweden, Neeme Järvi, Vladimir Spivakov, Vassily Sinaiski y Christoph Poppen. Apasionada de la música de cámara, collabora davezu cola pianista xeorxana Nino Gvetadze y la violonchelista serbia Maja Bogdanović, con quien actuó nel Concertgebouw d'Ámsterdam, el Muziekgebouw d'Eindhoven y la Tonhalle de Düsseldorf; n'España foi Artista Asociada del Quantum Ensemble, entós residente del Auditoriu de Tenerife, y ye convidada davezu del Delft Chamber Music Festival. Grabó les seis Sonates pa violín solu d'Eugène Ysaÿe pa Linn Records, asina como les sonates pa violín y pianu de Ravel, Respighi, Granados y Weber pa Naxos.
Como concertino trabayó, ente otres, cola Orquesta de la Radio de los Países Baxos, la Orquesta Nacional d'España (con Jörg Widmann) y la Orquesta Sinfónica del Principáu d'Asturies (con Carlos Miguel Prieto, Joana Carneiro y Nuno Coelho). Comprometida cola formación de xóvenes talentos, ye profesora de violín (asignatura principal) en Codarts, el Conservatoriu de Róterdam, y enantes enseñó nel Centro Superior de Música Katarina Gurska y na Universidá Alfonso X el Sabio de Madrid, amás d'impartir clases magistrales n'Alemaña, Eslovaquia, Sudáfrica, España, Taiwán y Estaos Xuníos. «Pa min ye esencial tresmitir el fueu interior —afirma—: non solo la pasión pola mio profesión, sinón tamién l'oficiu en sí, en tolos sos matices.» Nacida y criada en La Haya, formóse nel Real Conservatoriu de la so ciudá natal con Lex Korff de Gidts, Peter Brunt y Jaring Walta (1998–2004) y completó los sos estudios con Mauricio Fuks na Jacobs School of Music de la Indiana University (2004–2008). Toca'l violín «Ex-Reine-Elisabeth» de Pietro Guarneri (Venecia, 1725) con un arcu d'Eugène Sartory, dambos cedíos pol Fondu Nacional d'Instrumentos Musicales de los Países Baxos.