NOTA DE PRENSA

Pa espublización inmediata · Lleiguarda, xunu de 2026

El Festival ADAR celebra la so sesta edición del 4 al 16 d'agostu de 2026 nel mediu rural asturianu

Descargar cartelu ↓

Once conciertos, siete sedes patrimoniales, seis conceyos y trece intérpretes internacionales. L'Asociación pal Desendolcu de les Artes nel Mediu Rural presenta la sesta edición del Festival ADAR, con entrada llibre en tolos conciertos por aciu de reserva previa n'Eventbrite.

LLEIGUARDA, Balmonte de Miranda, Asturies. — El Festival ADAR celebra la so VI edición del 4 al 16 d'agostu de 2026 con un programa que percuerre ilesies, monasterios, un parador, un palombar, un auditoriu municipal, hórreos patrimoniales y les calles de Lleiguarda. La propuesta amiesta música de cámara contemporánea, arte visual, intervenciones sonores site-specific, residencies artístiques y actividaes venceyaes al patrimoniu rural asturianu.

Na so sesta edición, ADAR conselídase como ún de los proyectos de referencia pa la música clásica, la creación contemporánea y l'arte visual nel mediu rural asturianu. Dende Lleiguarda y con un programa que s'estiende per distintos conceyos d'Asturies, el festival axunta esti añu a artistes asturianos, nacionales ya internacionales de primer nivel, afitando un modelu cultural qu'entemez escelencia artística, patrimoniu, paisaxe y participación comunitaria.

El proyectu caltién el sofitu del Principáu d'Asturies y da en 2026 un nuevu pasu na so proyeición europea tres la seleición d'ADAR como organización anfitriona dientro de Culture Moves Europe · Call for Residency Hosts, el programa de movilidá cultural financiáu por Creative Europe de la Xunión Europea ya implementáu pol Goethe-Institut. Esta dimensión internacional súmase a la so participación nel ecosistema cultural d'Oviedo 2031, ciudá candidata a Capital Europea de la Cultura, reforciando'l papel d'ADAR como plataforma de creación dende'l territoriu rural asturianu escontra Europa.

La edición entama'l martes 4 d'agostu con un recital de clave d'Ignacio Prego nel hórreu ganador del Concursu d'Hórreos y Paneres 2026, que la so sede s'anunciará'l 1 d'agostu. El programa, tituláu «De danzas y sonatas», propón un percorríu peles formes de danza pa tecláu ente los sieglos XVI y XVIII, con obres d'Antonio de Cabezón, les Folíes d'España y la Chacona de la Partita pa violín en re menor de J. S. Bach, en transcripción de Johannes Brahms. Pola mor del aforu llimitáu de los hórreos, ufiertaránse dos pases de 30 minutos.

El ciclu «ADAR en ruta» axunta cuatro conciertos itinerantes de cámara. «La forma de la memoria», con María Martínez, Frederieke Saeijs y Josefina Urraca, preséntase los díes 5 y 6 d'agostu na biblioteca del Parador de Corias, en Cangas del Narcea, y nel Monasteriu de San Antolín de Bedón, en Llanes, con obres de Lili Boulanger, Rajmáninov, Brittney Benton, Haydn, Messiaen y Shostakóvich.

El 11 d'agostu, el tríu formáu por Maria Florea, Lara Fernández y Daniel Claret presenta «The Rest is Silence» nel Auditoriu As Quintas d'El Franco, con un programa construyíu al rodiu de la idea de la soledá y obres de Ligeti, Shostakóvich, Gubaidúlina, Kurtág, Webern, Penderecki, Stravinsky, Cage y Bach. El 13 d'agostu, el mesmu tríu amplíase a quintetu nel Monasteriu de Villanueva de Uscos, con obres de Schubert, Joan Magrané, Devin Cholodenko, Brahms y Dvořák.

El coleutivu Menhir, formáu por Coco Moya ya Iván Cebrián, robla una intervención site-specific demientres los díes 8 y 9 d'agostu nel palombar de Lleiguarda, de 19:00 a 22:00. Trátase d'un percorríu sonoru xeollocalizáu qu'entemez elementos musicales, sonoros y testuales qu'apaecen según l'allugamientu del caminante. La ruta pue facese individualmente o en grupu demientres dambes xornaes.

El programa inclúi tamién «UMBRAL ZERO», un conciertu de música minimalista con Guillermo Laporta y Josefina Urraca nel Aula del Oru de Balmonte de Miranda'l 7 d'agostu; un microconciertu de quintetu nel Centru ADAR de Lleiguarda demientres l'eclís solar del 12 d'agostu; y «Equilibrium», una muestra de residencia del tríu The Rest Project nel segundu hórreu seleicionáu pol xuráu'l 14 d'agostu, con dos pases de 20 minutos.

El paséu sonoru del 15 d'agostu per Lleiguarda y el conciertu de zarru del 16 d'agostu na ilesia parroquial zarren la edición. El zarru axunta a Natania Hoffman, Žilvinas Brazauskas, Frederieke Saeijs, Guillermo Laporta y Josefina Urraca nun programa con obres de Vivaldi (arr. Bach), Mendelssohn, Brahms, Ravel, Ligeti y Lang, siguíu d'una espicha abierta al públicu.

El festival ta dirixíu por Josefina Urraca y Guillermo Laporta, responsables de la direición artística y el comisariáu. La edición cuenta amás con Zygmund de Somogyi como compositor residente y Guillermo Ordás como cinematógrafu encargáu de la documentación audiovisual.

Programación completa

• 4 AGO · 20:30 · «De danzas y sonatas» — Micro conciertu n'hórreu · Recital de clave con Ignacio Prego (Cabezón, Purcell, Scarlatti y la Chacona de Bach en transcripción de Brahms). Inauguración · Concursu d'Hórreos y Paneres. Dos pases de 30 minutos. Hórreu ganador del concursu, sede anunciada'l 1 d'agostu.
• 5 AGO · 20:30 · «La forma de la memoria» — Tríu con pianu de María Martínez, Frederieke Saeijs y Josefina Urraca (Boulanger, Rajmáninov, Brittney Benton, Haydn, Messiaen y Shostakóvich). ADAR en ruta. Biblioteca del Parador de Corias, Cangas del Narcea.
• 6 AGO · 20:30 · «La forma de la memoria» — Segunda presentación del mesmu tríu. ADAR en ruta. Monasteriu de San Antolín de Bedón, Llanes.
• 7 AGO · 20:30 · «UMBRAL ZERO» — Música minimalista y arte visual con Guillermo Laporta y Josefina Urraca (Richter, Laporta, Zygmund de Somogyi, Bach, Hannah Selin, Satie, Scriabin y Meredith Monk). Aula del Oru, Balmonte de Miranda.
• 8 y 9 AGO · 19:00 a 22:00 — Intervención site-specific del coleutivu Menhir: percorríu sonoru xeollocalizáu nel palombar de Lleiguarda, con Coco Moya ya Iván Cebrián.
• 11 AGO · 20:30 · «The Rest is Silence» — Tríu de Maria Florea, Lara Fernández y Daniel Claret, con obres de Ligeti, Shostakóvich, Gubaidúlina, Kurtág, Webern, Penderecki, Stravinsky, Cage y Bach. ADAR en ruta. Auditoriu As Quintas, A Caridá, El Franco.
• 12 AGO · 20:30 · Microconciertu demientres l'eclís — Quintetu con pianu (Florea, Fernández, Claret, Laporta y Urraca) col op. 81 de Dvořák y Twilight at Dawn de Devin Cholodenko. Centru ADAR, Lleiguarda.
• 13 AGO · 20:30 · Conciertu de cámara y arte visual — Quintetu con obres de Devin Cholodenko, Schubert, Joan Magrané, Brahms y Dvořák. ADAR en ruta. Monasteriu de Villanueva de Uscos.
• 14 AGO · 20:30 · «Equilibrium» — Muestra de residencia del tríu The Rest Project: programa abiertu desarrolláu demientres la residencia, cola poesía de Joan Margarit. Dos pases de 20 minutos. Segundu hórreu ganador del concursu.
• 15 AGO · 21:30 · Paséu sonoru per Lleiguarda — Creación site-specific con Natania Hoffman, Žilvinas Brazauskas, Frederieke Saeijs, Guillermo Laporta y Josefina Urraca. Calles de Lleiguarda.
• 16 AGO · 21:30 · Zarru — Conciertu de quintetu con obres de Vivaldi (arr. Bach), Mendelssohn, Brahms, Ravel, Ligeti y Lang, siguíu d'espicha abierta. Ilesia parroquial de Lleiguarda.

Concursu d'Hórreos y Paneres

La convocatoria del Concursu d'Hórreos y Paneres 2026 ta abierta. ADAR convida a propietarios, conceyos y comunidaes a proponer un hórreu o panera como sede de dos conciertos del festival. Cada hórreu seleicionáu recibe un premiu de 300 € y acoyerá'l recital inaugural del 4 d'agostu o la muestra de residencia del 14 d'agostu.

Dambos conciertos n'hórreos ufiertaránse en dos pases (de 30 minutos el 4 d'agostu y de 20 minutos el 14), col envís d'axustar la esperiencia al espaciu, favorecer una escucha cercana y permitir l'asistencia de distintos grupos de públicu.

El plazu de candidatures ta abiertu fasta les 23:59 h del 25 de xunetu de 2026. Los ganadores espublizaránse'l 1 d'agostu de 2026.

Pa participar, hai qu'unviar un corréu a leiguardamusic@gmail.com col asuntu «Candidatura Concursu Hórreos 2026», incluyendo datos del solicitante, allugamientu y descripción del hórreu o panera, semeyes y autorización de la propiedá cuando correspuenda. Bases completes na páxina del concursu.

Tocante a ADAR

L'Asociación pal Desendolcu de les Artes nel Mediu Rural ye una organización cultural ensin ánimu d'arriquecimientu con sede en Lleiguarda, Balmonte de Miranda, Asturies. Fundada en 2020 por Guillermo Laporta y Josefina Urraca, ADAR desendolca proyectos qu'axunten música clásica contemporánea, arte visual, patrimoniu y paisaxe rural.

La llinia de trabayu d'ADAR al rodiu de paisaxe, escucha y sostenibilidá recibió yá un reconocimientu tempranu al traviés de «Paseos Sonoros», proyectu ganador de la convocatoria Green Music & Entrepreneurship (GreenME) de la Escuela Superior de Música Reina Sofía, financiada por MusicAIRE dientro del programa Creative Europe de la Xunión Europea. Esta iniciativa abrió una llinia d'investigación artística qu'axunta música, mediu ambiente, patrimoniu rural y aición comunitaria, y que sigue desendolcándose nes residencies ya intervenciones site-specific del festival.

Dende la so primer edición en 2021, el Festival ADAR activó aldees, ilesies, hórreos, monasterios y espacios patrimoniales del mediu rural asturianu, conselidándose como un proyectu cultural con dimensión rexonal, nacional ya internacional.

El festival trabaya con un modelu descentralizáu basáu en residencies artístiques, collaboración con conceyos anfitriones, documentación audiovisual, circulación internacional y programación d'entrada llibre. Cuenta col sofitu del Principáu d'Asturies, Culture Moves Europe, Caja Rural y una rede de collaboradores culturales.

Descargues

Cartelu oficial y una seleición d'imáxenes n'alta resolución, llibres pa usu editorial con créditu a Festival ADAR. Calca en cada imaxe p'abrir o descargar el ficheru.

Materiales pa prensa

Biografíes completes de los intérpretes, material técnicu y acreditaciones tán disponibles baxo pidimientu. Solicítelos indicando mediu, nome del periodista y enfoque previstu del reportaxe.

— fin —